सोबत sobat (surekha ashok borhade)

सोबत

काय असं  सुख आहे की
मी मादी आहे म्हणून...
अजूनही तसंच परंपरागत असणं तुला बरं वाटतं...
अगदीच पंख गाळून बसलं तर तेही तुला मिळमिळीत वाटतं
मग तुच पुन्हा करतोस
तुच्छ लेखून माझा चोळामोळा
अगदीच केविलवाना...
जरा कुठं पंख झटकून-फटकून
उडू पहाते मोकळेपणाने तर माझ्या उडण्याचा तो डौल तुलाही झाकाळून टाकतो .....
मग तुच पुन्हा ते माझे दमदार उडणे सहन न होऊन
पुन्हा पुन्हा चोच मारुन
करतो मला रक्तबंबाळ....
अगदीच बेदरकारपणे....
पुन्हा जखमी लाचार होऊन
तुझ्या मागणं असाह्यपणे..... अगतिकतेने उडणेच
तुझ्या पुरुषी अहंमला सुखावते का?
खरं तर बळ आहे माझ्या पंखातही .....आकाश कवेत घेण्याचे....पण
मला कायमच आवडतो तुझ्या
भरारीतील छंद....गंध....अन् वेगही...
आणि हो आवडतं मला.... तुझ्यातला पुरुषार्थ फुलवायला...
कारण माझ्याशिवाय तो फुलूच
शकत नाही....
म्हणूनच म्हणते चल ना...
ना मागे...ना पुढे.....
सोबतच बरोबरीने उडू या
त्या क्षितिज्याच्या इंद्रधनुषी
झुल्यावर झुलण्यासाठी...

सौ.सुरेखा अशोक बो-हाडे
नासिक.
--------------------------------------------------------------------------------------------------------------------------
सदर ब्लॉग वरील साहित्यात फेरफार करणे, कॉपी पेस्ट करून स्वतः च्या नावाने साहित्य पोस्ट करणे हा सायबर क्राईम कायद्याअंतर्गत गुन्हा आहे. ब्लॉगवरील साहित्याचा अनुवाद करणे, त्याचा व्यावसायिक वापर करणे ,नाट्यीकरण करणे अथवा कोणत्याही कारणास्तव आपणास हे साहित्य वापरावयाचे असल्यास लेखकाची रीतसर परवानगी घेणे गरजेचे आहे.
                                              संपादक - कादवा शिवार