कविता - रानातली दिवाळी : एक मनमोहक काव्य ✍️संतोष गाढवे

 *रानातली दिवाळी*

सोनसळी भुईवर 

पानाफुलांची रांगोळी 

दान मातीचा घेऊन 

आली रानात दिवाळी

आभाळाच्या अंगणात 

लक्ष तारकांचे दिवे 

चंद्र आकाशकंदिल

बोला आणि काय हवे?

पाखरांचे अभ्यंगस्नान 

ओल्या दवांत न्हावुन

पिकं हसती डोलती

उटणं मातीचं लेऊन 

खळ्यादळयात गोकुळ 

गाई गुरांचे हंबर

अंधाराला काजव्यांचे

कुणी टांगले झुंबर 

असा गर्जतो वळीव

फुटे ढगांचे फटाके 

इजं जणू फुलबाजा

वारा होई भुईचक्रे

रानावनाच्या कपारी

रानमेव्याचा फराळ

लाडू करंज्या कशाला?

गोड बोरं सिताफळ 

रानातल्या दिवाळीचा

गावरान वानवळा 

येई फराळ चाखण्या 

पाखरांचा गोतावळा

नको अप्रुप माणसा

तुझी हंगामी सुकाळी

ये शिवारात जरा

रोज रानात दिवाळी 

        ‌-संतोष गाढवे 

         राजगुरुनगर 

         पुणे,४१०५०५

         ९०४९३१८६५६