दिवाळी विशेष कविता - भास - ✍️काशिनाथ गवळी

भास

मना लावी हुरहूर

सण वर्षाचा दिवाळी

जीव आसुसला माय

भाऊ पाठव मुऱ्हाळी

सुख दुःख परिहार

तुझ्या कुशीत विसावा

बाप थकलेला जीव

डोळे भरून पहावा

दोन दिस भेटीगाठी

तोच परतीचा ध्यास

जागेपणी छळतात

पुन्हा स्वप्नातले भास

माय आवर हुंदका 

सोड हातातला हात 

गाय बांधलेली तुझी 

कसायाच्या गं दारात

सांग भावाला निरोप 

नको करू देव घेव

एक जागा बहिणीला 

सांदी कोपऱ्यात ठेव 

 --------------

काशिनाथ  गवळी

 नांदगाव  नाशिक

 ९८५०४४१२८७