Read more
हिरव्या बोलीचे शब्द
काल मी ऐकले जेव्हा
हिरव्या बोलीचे शब्द,
झालो मी खरोखरीच
नतमस्तक ! निःशब्द !
कष्टकरी शेतकरी
हा मातीत रापलेला,
कवितेचा गाव सारा
हा अंगात मुरलेला!
घेतला निसर्ग ज्यांनी
मुरवून अंगामध्ये ,
रुजला मनात सारा
अंकुरला काव्यामध्ये!
नसे हा केवळ कवी
हाडाचा हा शेतकरी,
साक्षात सावता माळी
शेतात ज्याची पंढरी!
कविता ज्यांची केवळ
ना बुडबुडे शब्दांचे,
परीसस्पर्श रानाचा
जगणे मातीवरचे!
मातीची प्रेमळ ओढ
माणूस जोडीत जाते,
ही नाळ उभ्या जन्माची
सावली मायेची देते!
येथील शेतसराई
भिजते रोज घामात,
पुलकित होते माती
फुलते रोमारोमात!
मराठी विश्वातला हा
एक थोर मानदंड ,
ग्रामीण साहित्याचीही
करीतो सेवा अखंड!
' विजयकुमार मिठे '
मिठ्ठास सार्थ हे नाव!
प्रकाश पेरीत आहे
उजळते आहे गाव!
येवो बरकत पुन्हा
बळीराजा सुखी व्हावा!
' कादवा शिवार ' नाव
झेंडा नभी फडकावा!!
- तु.सी.ढिकले
7588828834
------------------------------------------------------------------------------------------------------------------------------------------------------
...सावधान...
सदर ब्लॉग वरील साहित्यात फेरफार करणे, कॉपी पेस्ट करून स्वतः च्या नावाने साहित्य पोस्ट करणे हा सायबर क्राईम कायद्याअंतर्गत गुन्हा आहे. ब्लॉगवरील साहित्याचा अनुवाद करणे, त्याचा व्यावसायिक वापर करणे ,नाट्यीकरण करणे अथवा कोणत्याही कारणास्तव आपणास हे साहित्य वापरावयाचे असल्यास लेखकाची रीतसर परवानगी घेणे गरजेचे आहे.
संचालक - कादवा शिवार
प्रतीक विजयकुमार मिठे
मो.9145099071
Kadva shivar
कादवा शिवार
0 coments