वारकरी vari (sachin gangurde)

सरी, सरीतून नाचे

विठोबाचे वारकरी

साऱ्या शेतमधी माझ्या

उभी जाहली पांढरी

वारकऱयांच्या माथाळी

दिशे मातीचाच बुक्का

विळा खुरपे ते हाती

झाला बाप माझा तुका

माझ्या बैलांच्या गळ्यात

घाटी घुंगराचे टाळ

विठू धरता रुमणे

जाई खोल,खोल फाळ

माझी माय रखुमाई

झाली इंद्रायणी पाणी

खळाळतो पाट सारा

चोख्याची अभंग वाणी

पीक  डोलतात अशी

जणू पताका भासते

धरोळ्याव येता मोट

जणू जनाई हासते

ज्याही भरल्या विटेला

गोऱ्या कुंभराचा हात

विठू संत पाठीराखा

त्याला नाही जात पात

पीक हुरड्याव येता

साऱ्या पंढरीत नक्षी

आल्या आभाळान दिंड्या

झाले वारकरी पक्षी 

 ("जमीन कासण्याची कला" ह्या संग्रहातून)

                                                  कवी,सचिन गांगुर्डे

                                                    (पिंपळगाव बसवंत)

                                                   मो,9767813955

----------------------------------------------------------------- ...सावधान...

सदर ब्लॉग वरील साहित्यात फेरफार करणे, कॉपी पेस्ट करून स्वतः च्या नावाने साहित्य पोस्ट करणे हा सायबर क्राईम कायद्याअंतर्गत गुन्हा आहे. ब्लॉगवरील साहित्याचा अनुवाद करणे, त्याचा व्यावसायिक वापर करणे ,नाट्यीकरण करणे अथवा कोणत्याही कारणास्तव आपणास हे साहित्य वापरावयाचे असल्यास लेखकाची रीतसर परवानगी घेणे गरजेचे आहे.

                                              संचालक - कादवा शिवार

                                              प्रतीक विजयकुमार मिठे

                                              मो.9145099071

                                          #Team Kadva shivar