आठवणींचा ठिसूळ पापड (rajendra ugale)

पानोठ्यावर येता गाई

माहेराची तशीच घाई

तरंग उठता पाण्यावरती

मना आठवे थकली आई... 

हिसका देता सुटले कापड

आठवणीचा ठिसूळ पापड

चुरा घेतला मुठीत सारा 

हृदयामध्ये होते धडधड... 

पिळा घातला दोन्ही हाती

पिळुन काढली सारी नाती 

पिळता पिळता गालावरती 

चमचमणारे जमले मोती...

डोक्यावरती ओली चुंबळ

प्रेम पाझरे अंगी भळभळ

जखमेवरती हात फिरवता

नेत्री वाहे पाणी खळखळ...

पायाखाली वाट तापली 

जखमेवरची निघली खपली

खुज्या मनाला साद घालुनी

अरुंद खोली पुसुन घेतली...

मला कळाले वळणावरती 

रडून घ्यावे मी एकांती 

डोळे ओले पुसण्यासाठी 

रुमाल देऊ कोण्या हाती... 

*राजेंद्र उगले* नाशिक

मोबाईल- ९९२२९९४२४३

------------------------------------------------------------    ...सावधान...

सदर ब्लॉग वरील साहित्यात फेरफार करणे, कॉपी पेस्ट करून स्वतः च्या नावाने साहित्य पोस्ट करणे हा सायबर क्राईम कायद्याअंतर्गत गुन्हा आहे. ब्लॉगवरील साहित्याचा अनुवाद करणे, त्याचा व्यावसायिक वापर करणे ,नाट्यीकरण करणे अथवा कोणत्याही कारणास्तव आपणास हे साहित्य वापरावयाचे असल्यास लेखकाची रीतसर परवानगी घेणे गरजेचे आहे.

                                              संचालक - कादवा शिवार

                                              प्रतीक विजयकुमार मिठे

                                              मो.9145099071

                                           #Team Kadva shivar