मुक्तवारा muktvara (surekha borhade)

स्वत:लाच शोधणा-या
मग्न जगातून
अचानक वावटळीने
यावं बाहेर
कोश फाटून.......
झगमगत्या या दुनियेत
डोळ दिपतात- मिटतात......
दररोज बदलत्या नव्या जगात
उभा राहण्याचा नवा प्रयत्न
मुखवटा धारक हा समाज
अभासी प्रतिमाच मनाच्या आरशात!......
संवेदनाच्या शोधात भावनाच
गोठून गारठून जातात
स्वार्थाच्या गदारोळात म्हणा
किंवा जगण्याच्या चढाओढीत
चिरडली जातात नकळत अस्मितेची फुलं
सत्याच्या स्वत्वाच्या हुंकाराची गळचेपी!......
ठणठणाटी वाद्यगजरात विरते....
मनाची धुसमट सारी....
जाणीवा-नेणिवाही बोथट-लुळा
करणारा हा कुंद वारा
पायांना अशक्त करणा-या घटना
भेदरवून भरडवून जातात
अगदी दररोज!....
हसत्या खेळत्या चेह-यामागे लपवून
भशभळणा-या या वेदना असह्य
अतर्क.......
तरीही अनिवार्य सारंच .......
सरावानं पचेल हे अवजड वास्तव
की याच रचनेच्या जाळ्यात अडकून
गुंतून पडता होईल तेही एक शून्य!....
तेव्हा कळवळून आठवतो .......
कोठे माझा गांव
जिथे श्वास घेता येईल मुक्त
अगदी इतका मनमुराद की
अवकाशाची पोकळी थिटी पडावी
मुक्तवारा....आसमंत सारा!....


                                                        सौ.सुरेखा बोऱ्हाडे
                                                               (नाशिक)
-------------------------------------------------------------------
                            ...सावधान...
सदर ब्लॉग वरील साहित्यात फेरफार करणे, कॉपी पेस्ट करून स्वतः च्या नावाने साहित्य पोस्ट करणे हा सायबर क्राईम कायद्याअंतर्गत गुन्हा आहे. ब्लॉगवरील साहित्याचा अनुवाद करणे, त्याचा व्यावसायिक वापर करणे ,नाट्यीकरण करणे अथवा कोणत्याही कारणास्तव आपणास हे साहित्य वापरावयाचे असल्यास लेखकाची रीतसर परवानगी घेणे गरजेचे आहे.

                                             संचालक - कादवा शिवार
                                              प्रतीक विजयकुमार मिठे
                                                 मो.9145099071
                                           #Team Kadva shivar