असं काही घडून यावं as kahi ghadun yav (rajendra ugale)

उन्हाने द्यावा गारवा 

थंडीने पांघरावे ऊन

पावसाळ ढगांच्या विजांनी

वाजवावी कोकिळ धून... 

बांधावे पायात रागाने 

बोल माधुर्याचे चाळ

गाळू नये दुःखाने डोळ्यातून 

कोरड्या आठवांचा गाळ... 

बोरीच्या काट्यानी खुशाल

आमराई गोडवा ल्यावा 

नात्यातला कडवटपणा 

कडूलिंबाने न्यावा... 

ज्याचं त्याचं ज्याला त्याला 

असं असूच नये काही

प्रत्येकाच्या दारात जाण्याची 

आनंदाने द्यावी ग्वाही... 

घडत नाही अपवादानेही 

असं काही घडून यावं

औषधासारखं का असेना  

थोडं थोडं सुख सर्वांना द्यावं...

                                                *राजेंद्रउगले* नाशिक 

                                             मोबाईल-९९२२९९४२४३

------------------------------------------------------------------  ...सावधान...

सदर ब्लॉग वरील साहित्यात फेरफार करणे, कॉपी पेस्ट करून स्वतः च्या नावाने साहित्य पोस्ट करणे हा सायबर क्राईम कायद्याअंतर्गत गुन्हा आहे. ब्लॉगवरील साहित्याचा अनुवाद करणे, त्याचा व्यावसायिक वापर करणे ,नाट्यीकरण करणे अथवा कोणत्याही कारणास्तव आपणास हे साहित्य वापरावयाचे असल्यास लेखकाची रीतसर परवानगी घेणे गरजेचे आहे.

                                              संचालक - कादवा शिवार

                                              प्रतीक विजयकुमार मिठे

                                              मो.9145099071

                                          #Team Kadva shivar